عمران خان کو اُن کی بہن اور پی ٹی آئی نے خود ہی مائنس کردیا، عظمیٰ بخاری
لاہور:
وزیر اطلاعات پنجاب عظمیٰ بخاری نے کہا ہے کہ عمران خان کو ان کی بہن اور خود ان کی جماعت ہی نے مائنس کر دیا ہے۔
اپنے بیان میں صوبائی وزیر نے کہا کہ جو شخص نواز شریف کو سیاست سے مائنس کرنے آیا تھا، آج قدرت کے انتقام کا نشانہ بن کر خود نہ صرف گھر بلکہ اپنی ہی پارٹی سے مائنس ہو چکا ہے۔
عظمیٰ بخاری نے کہا کہ علیمہ خان مسلسل علی امین گنڈاپور کے خلاف سازشیں کر رہی ہیں اور خود علی امین نے بھی آج اس بات کا برملا اظہار کیا ہے۔ انہوں نے کہا کہ علی امین گنڈاپور نے بطور چیف ایگزیکٹو صوبائی بجٹ منظور کروایا، ورنہ ان کا گھر جانا آئینی طور پر طے تھا۔
انہوں نے مزید کہا کہ علیمہ خان گروپ اور پی ٹی آئی کا سوشل میڈیا سیل مل کر علی امین کے خلاف منظم مہم چلا رہا ہے جب کہ پارٹی کے اندر وفاق میں 3 گروپس اور خیبرپختونخوا میں مزید 3 علیحدہ گروپس موجود ہیں۔
صوبائی وزیر اطلاعات کا کہنا تھا کہ خیبرپختونخوا میں جنید اکبر ایک گروپ کو لیڈ کر رہے ہیں، دوسرا گروپ عاطف خان کے زیر قیادت ہے اور تیسرا گروپ پارٹی کے ان باغیوں پر مشتمل ہے جو اپنی راہ الگ کر چکے ہیں۔
انہوں نے خیبرپختونخوا کی صورتحال کو شدید تنقید کا نشانہ بناتے ہوئے کہا کہ یہ صوبہ گزشتہ 12 برس سے ریلو کٹوں اور کرپٹ عناصر کے رحم و کرم پر ہے، جنہوں نے گورننس کا بیڑا غرق کر دیا ہے۔
انہوں نے کہا کہ پنجاب میرٹ، شفافیت اور اچھی حکمرانی میں باقی تمام صوبوں کے لیے ایک رول ماڈل بن چکا ہے۔ انہوں نے وزیر اعلیٰ پنجاب مریم نواز کی کارکردگی کو سراہتے ہوئے کہا کہ وہ تمام وزرائے اعلیٰ میں سرفہرست ہیں اور عوامی فلاح کے حقیقی ایجنڈے پر عمل پیرا ہیں۔